Жарияланған күні: 30.05.2024

---

Халықаралық балаларды қорғау күнінде Астана қаласында алғаш рет Aiala республикалық арт-эко фестивалі өтеді, деп хабарлайды Азаматтық бастамаларды қолдау орталығының баспасөз қызметі.

Aiala фестивалі – бұл еліміздің түкпір-түкпірінен келген мектеп оқушылары өнер арқылы қоршаған ортаға деген алаңдаушылықтарын білдіретін ерекше мүмкіндік.

Қазақстанның түкпір-түкпіріндегі 250-ден астам оқушы бір ай ішінде 6 санаттағы экология тақырыбына сәйкес бірегей жұмыстар жасай отырып, өздерінің таланттары мен креативтілігін көрсетті:

Beınele – бейнелеу өнері (фото, кескіндеме);

Árle – перфоманс (мүсін және инсталляция);

Qara – видеомейкинг (фильмдер, роликтер);

Sezin – арт перфоманс (театр, көше перфоманстары, флешмобтар);

Sóıle – музыка және поэзия (әндер, өлеңдер);

Órnekte – сәндік-қолданбалы өнер (тоқыма, керамика бұйымдары).

Бүгіндері ақтық сынға өткен 36 финалист анықталды. Ал 1 маусым –  Халықаралық балаларды қорғау күні жеңімпаздардың есімдері белгілі болады.

Сондай-ақ, фестиваль аясында киіз басу, кескіндеме, қаржылық сауаттылық және макулатурадан панно жасау бойынша шеберлік сабақтары өтеді.

Балаларды интерактивті ойын-сауық, кейтеринг және мерч саудасы күтеді. Сатылымнан түскен қаражат экологиялық қорлардың шоттарына аударылады.

Іс-шараның арнайы қонағы – JOLDA би театры.

Кіру тегін, іс-шара ұйымдастырушылары барлық ниет білдірушілерді фестивальге қатысуға шақырады. Отбасыңызбен бірге шығармашылық және арт-эко әлемімен жақынырақ танысу мүмкіндігінен құр қалмаңыздар!

Күні: 1 маусым

Уақыты: сағ. 12.00

Күні: 2 маусым

Уақыты: сағ. 10.00

Өтетін орны: Бейбітшілік және Келісім сарайы (Атриум, 3-қабат), Астана қ.

Aiala арт-эко фестивалін ұйымдастырушылар: Қазақстан Республикасының Мәдениет және ақпарат министрлігі және «Азаматтық бастамаларды қолдау орталығы» КеАҚ.

Бас демеуші – «Халық» қайырымдылық қоры.