Еріктілер өзендер мен орманды жерлерді тазарту, ағаш отырғызу, қоқыстарды сұрыптау және экологиялық қауіпсіздік жөніндегі тренингтер сияқты әртүрлі бастамаларды іске асыруға белсене араласады.

«Birgemiz: Taza Álem» жалпыұлттық жобасының маңызды бағыттарының бірі – волонтерлерді даярлау және оқыту. 2024 жылдың соңына дейін жалғасатын жобаға кемінде 8 мың эковолонтер тартылатын болады деп күтілуде.

«Birgemiz: Taza Álem» жобасының менеджері Әйгерім Қазизованың айтуынша, биыл ұйымдастырушылар қазақстандықтардың экология саласындағы біліктілігін арттыруға бағытталған бірқатар іс-шараны өткізуді жоспарлап қойған.

«Ел тұрғындарының көпшілігі экология тақырыбына қызығушылық танытады. Алайда олардың көбі оқуды неден бастау керектігін білмейді. Осыған байланысты, «Әлеуметтік жобалар қоры» КҚ әртүрлі форматтағы кемінде 16 эко-жобаны өткізуді жоспарлап отыр. Бұл – дәрістер, воркшоптар, шеберлік сағаттары және қалдықтарды бөлек жинау, қоқысты кәдеге жарату тәсілдері, эко-волонтерлердің құзыреттері сияқты өзекті тақырыптарға арналған тренингтер сияқты іс-шаралар. Оқыту шараларына экологтар, эко-жаттықтырушылар  сияқты бейінді мамандар мен экология саласындағы белсенді азаматтар тартылмақ», – дейді Әйгерім Қазизова.

Сондай-ақ, жобаны іске асыру аясында шағын гранттарды ұсыну жөніндегі конкурс өтеді. Ұйымдастырушылар экологиялық мәдениетті қалыптастыруға және экологиялық проблемаларды шешуге жұртшылықтың назарын аударуға, өзендер мен ормандарды тазартуға бағытталған іс-шараларды өткізу жөніндегі кемінде 30 волонтерлік бастаманы қолдайды. Әрбір гранттың мөлшері кемінде 300 мың теңгені құрайды.

Сонымен қатар, биыл қоғам белсенділері сенбіліктер, ағаш отырғызу акциялары, шеберлік сағаттары, эко-жәрмеңкелер мен челлендждер ұйымдастыруды жоспарлап отыр.

«Birgemiz: Taza Álem» әлеуметтік жобасы 2020 жылдан бастап ҚР Ақпарат және қоғамдық даму министрлігінің және Азаматтық бастамаларды қолдау орталығының қолдауымен жүзеге асырылуда.