Жарияланған күні: 01.06.2022
Бүгін «Жасыл ел» еңбек маусымының салтанатты ашылу рәсімі өтті. Жоба жастарды еңбекке баулуды, табиғатты аялауға шақыруды көздейді.
«Жасыл ел» жастар еңбек жасақтарының жаңа маусымының ашылу салтанатына Қазақстан Республикасы Ақпарат және қоғамдық даму министрлігінің өкілдері, қоғам қайраткерлері, республикалық жастар ұйымдарының басшылары және «Жасыл ел» өңірлік штабтарының өкілдері қатысты.
«Жасыл ел» жалпыұлттық жобасы 2005 жылдан бері табысты жүзеге асырылып келеді. Бұл жастар арасындағы ең танымал бағдарламалардың бірі десем, қате емес. Бағдарлама аясында жас қазақстандықтар қалаларды көгалдандыруға қатысып, еліміздің экологиялық жағдайын жақсартуға өз үлесін қосып жатыр. Сонымен қатар, жоба еңбекке баулып қана қоймай, жастарды ортақ идеялар төңірегінде топтастырады», – деп атап өтті Азаматтық бастамаларды қолдау орталығы Басқарма төрағасының орынбасары Жасұлан Бисембиев.
«Жасыл ел» жастар еңбек жасақтары – экологиялық жобалар мен мемлекеттік бағдарламаларды іске асыру арқылы жастарды маусымдық жұмыспен қамтуға, қалалар мен елді мекендерді көгалдандыруға, абаттандыруға, жастарды патриоттық тұрғыда тәрбиелеуге бағытталған жалпыұлттық қозғалыс.
«Еңбек маусымының ашылуы – біз асыға күтетін ең маңызды оқиғалардың бірі. Жыл бойы жастар табыс тауып қана қоймай, тәжірибе де жинайды, өз қабілеттерін ұштайды, жаңа мүмкіндіктерді ашады. Жасақтарды іріктеу кезінде біз халықтың әлеуметтік осал топтарынан шыққан балаларға өздерін көрсетуге, демалыс кезеңінде ақша табуына көңіл бөлеміз. Биыл біз 30 мыңнан астам жасты жұмысқа орналастыруды жоспарлап отырмыз»,- деді «Жасыл ел» республикалық штабының жетекшісі Данияр Азамат.
Іс-шара «Жасыл ел» республикалық жастар еңбек жасақтары жұмысы маусымының ашылуы мен жабылуын ұйымдастыру және өткізу» атты әлеуметтік жобаны іске асыру шеңберінде өтуде. Жобаны Қазақстан Республикасы Ақпарат және қоғамдық даму министрлігінің және Азаматтық бастамаларды қолдау орталығының қолдауымен «Жасыл ел» жастар еңбек жасақтарының республикалық штабы ұйымдастырды.