Жарияланған күні: 07.04.2023
Әлеуметтік жоба ауылдық жерлерде тұратын жастардың мемлекеттік бағдарламалардан хабардарлығын арттыруға мүмкіндік бермек.
«Ауылдық аумақтарда жастар кәсіпкерлігін дамытуға жәрдемдесу» гранттық жобасын «Қазақстанның экологиялық қоры» қоғамдық қоры іске асырады. Жоба шеңберінде республиканың 17 өңірінде жұмыспен қамту және кәсіпкерлікті, қоғамдастықты дамыту бағытындағы мемлекеттік қолдау шараларына арналған ақпараттық бұрыштар мен ақпараттық ресурс құрылатын болады.
«Біз ауыл жастары арасындағы әлеуметтік кәсіпкерлердің іскерлік белсенділігін арттыруға бар күш-жігерімізді жұмсауға ниеттіміз. Бұл ауылдардағы табысты әлеуметтік тәжірибелерді анықтауға және оларды республикалық деңгейге шығаруға мүмкіндік береді.
Жобаны іске асыру барысында еліміздің барлық өңірлерінде біз кәсіпкерлікті дамытуды мемлекеттік және жеке қолдау шаралары түсіндірілетін бұрыштарды ұйымдастырамыз. Сондай-ақ, аудан орталықтарында NEET санатындағы ауыл жастарына арналған көшпелі дәрістер мен семинарлар өткізуді жоспарлап отырмыз. Балаларды еңбек нарығындағы трендтер мен перспективалы кәсіптер туралы хабардар ететін боламыз. Тұтастай алғанда, жоспарымызда 1600-ден астам адамды қамтуды бар», – деп түсіндірді жоба жетекшісі Айгүл Абдуалиева.
Жобаны ұйымдастырушылардың мәліметтеріне сүйенсек, NEET санатындағы жастардың басым бөлігі Ұлытау (12,7%), Шығыс Қазақстан (8,5%), Қарағанды (9,4%), Қызылорда (8%) облыстарында, Маңғыстау (7,5%), Түркістан (7,3%), Ақмола (5,6%), Қостанай облыстарында тұрады.
Айта кетейік, «Ауылдық аумақтарда жастар кәсіпкерлігін дамытуға жәрдемдесу» жобасы ҚР Ақпарат және қоғамдық даму министрлігінің қолдауымен 2024 жылдың соңына дейін іске асырылмақ.
Жоба операторы – Азаматтық бастамаларды қолдау орталығы.